amīr al-mu’mīnīn

Título árabe do Califa como Soberano dos Crentes. Foi outorgado por vez primeira a ‘Umar. Despois del levárono todos os califas omeias e abásidas, ademais doutros soberanos que non reunían as condicións esixidas polo dereito musulmán. Adoptárono diversas dinastías norteafricanas, xunto cos omeias e cos almohades de al-Andalus. Despois do ano 1253 foi reivindicado polos hafsidas de Ifrīqiya, polos mamelucos do Exipto e polos marinidas de Marrocos. Os sultáns otomanos fixeron uso del ata finais do 1922. En galego pódese atopar baixo a forma miramolín.