Amor

Deus romano, fillo de Venus, denominado tamén Cupido. É o equivalente do Eros grego. Na iconografía, nacida coa arte grega (Praxíteles, Lisipo), aparece representado como un mozo ou rapaz, ás veces acompañado de Afrodita. Pódense atopar representacións na arte paleocristiá e na arte copta. Despois da paréntese medieval, o tema volveuse tratar no Renacemento. Destacan as representacións de amor nas obras de Sandro Boticelli, Rafael, Correggio, Tintoretto e Tiziano, entre outros, nas que aparece a miúdo como complemento doutros temas: Angiolo Bronzino (Venus, o amor, a loucura e os tempos, National Gallery), Diego Velázquez (A Venus fronte o espello, National Gallery); ou en forma de cupidos, especialmente no Barroco, e sobre todo na escola francesa: Simon Vouet, Ker-Xavier Roussel e outros autores.