¹ acuario

Recipiente destinado á exhibición e mantemento de animais acuáticos vivos, cunha finalidade didáctica ou decorativa. As súas formas máis habituais son a esférica e a prismática de base rectangular. Dispón duns filtros para eliminar os desperdicios e os excrementos. Hai acuarios de auga quente destinados a especies que precisan unha temperatura superior a 20°C. Para manter o nivel de osíxeno e dióxido de carbono disoltos na auga dentro dos límites apropiados é preciso insuflar aire comprimido por medio dunha bomba de membrana. Por outra banda, a iluminación é importante para a vida dos peixes e as plantas.

Edificio ou local no que se atopan unha serie de recipientes ou depósitos destinados ao mantemento e á exhibición de animais acuáticos cunha finalidade fundamentalmente didáctica.