Barxa de Lor, ponte de

Situada sobre o río Lor entre as parroquias de Barxa de Lor (A Pobra do Brollón) e Quinta de Lor (Quiroga). Trátase dunha ponte de cachotería de orixe medieval (ss XIV ou XV), quizais reformada no s XVIII. Está formada por tres arcos, un deles moi soterrado, de diferentes formas (oxival e de medio punto) e materiais; así mesmo, os treitos son de moi desigual lonxitude. A súa rasante é alombada. Formaba parte do antigo camiño real de entrada a Galicia, derivado do Camiño Francés, e tivo bastante importancia como paso entre Galicia e a Meseta, como demostra o feito de que apareza en numerosos mapas e itinerarios dende o ano 1598.