Bubastis

Antiga cidade do Exipto faraónico, capital do nomós XVIII do Baixo Exipto, situada a uns 87 km ao NL do Cairo, no delta do Nilo, que se corresponde coa actual Tell Basta. A forma grega Bubastis e a hebrea Pibesth derivan do nome exipcio Pr-B3st (Templo de Bastet). Importante asentamento dende a prehistoria, converteuse na capital de Exipto durante o goberno dos hicsos. Tivo especial importancia como residencia da dinastía XXII, denominada bubastita (980-810). Coa dinastía XXX recuperou parte do pasado esplendor, pero durante pouco tempo. Na cidade celebrábase un famoso festival anual en honor á deusa Bastet. A decadencia desta cidade comezou cando, primeiro Naucratis e logo Alexandría, dirixiron o comercio cara ao brazo occidental do delta. Na época romana acentuouse o proceso, desaparecendo nos primeiros séculos da dominación musulmana. As escavacións de Naville por conta da Egypt Exploration Fund, de 1887 a 1889, descubriron materiais de case todas as épocas do Exipto faraónico e restos de tres templos.