² canela

1. [ALIM]
   1. s f

      Cortiza parda e aromática da caneleira que se presenta en forma de tiras finas superpostas que se enrolan ao secar e forman a canela en rama. Comercialízanse os canotiños enteiros, en anacos ou en po. As máis apreciadas son as de Sri Lanka, Penang, Saigón e China. Amplamente utilizada en repostería e como condimento para peixes, polo, arroces e outros pratos, sobre todo na cociña árabe. Tamén se extrae destas codias un aceite esencial que se usa como saborizante. A esencia, rica en aldehido cinnámico, utilízase como tónico estomacal, carminativo e antiséptico, e tamén en perfumería.

   2. canela branca

      Cortiza da caneleira branca, aromática, de sabor picante e amargo que se emprega como especia e como estimulante estomacal e tónico.

   3. canela da China

      Cortiza aromática da caneleira da China, substitutiva da canela, menos suave e non tan apreciada coma esta.

   4. canela en rama

      Cortiza da caneleira aromática que se presenta en forma de canudos.

2. s f [PLANTA]

   caneleira.

3. adx e s f

   Que ten unha cor semellante á canela, entre amarela e parda.

   Ex: Comprei un abrigo canela. Agasallouno cuns pantalóns de cor canela.

4. s f

   Cousa exquisita e refinada.

   Ex: Os canapés que nos serviron eran canela fina.

Formas incorrectas