Chillida Leku

Casa museo do escultor Eduardo Chillida situada en Hernani e inaugurada o 16 de setembro de 2000. Instalouse no caserío Zabalaga (s XVI), adquirido polo escultor e pola súa dona, Pilar Belzunce, en 1983. O edificio, restaurado polo arquitecto Joaquín Montero, acolle esculturas de pequeno formato realizadas en alabastro, mármore e ferro, maquetas, fotografías de monumentos, debuxos, gravados e gravitacións. No exterior, un xardín e un prado dunhas doce hectáreas constitúen o marco natural no que se instalaron as pezas de gran tamaño, de pedra ou ferro, mesturadas entre as árbores. O conxunto complétase cun edificio residencial para o artista e outro de servicios que alberga a biblioteca, o arquivo e un pequeno auditorio. Chillida e a súa dona cederon a propiedade da finca e das obras á sociedade limitada, formada pola familia do artista, que dirixe a institución.