³ cola

Árbore do xénero Cola da familia das esterculiáceas que se caracteriza por presentar follas de sinxelas a dixitadas, flores apétalas aromáticas e de pequeno tamaño (de 4 a 7 lóbulos), dispostas en acios sobre os troncos, que dan lugar a froitos en folículo. Existen máis de 100 especies propias de África e América tropical. Dúas destas especies, C. nitida e C. acuminata, cultívanse polas propiedades que teñen para o home as sementes e as noces de cola.

Extracto das sementes de certas especies do xénero Cola, que presentan cafeína, colamina, teína e teobromina, de propiedades estimulantes e excitantes para o home, polo que se mastigan directamente. Emprégase na fabricación de bebidas e doutros produtos alimentarios tonificantes ou, en medicina, como estimulante estomacal, tónico, analéptico e astrinxente intestinal.

Bebida carbónica na que se utilizan extractos de cola. Está fortemente acidulada con ácido fosfórico, coloreada con caramelo, edulcorada con azucre e aromatizada con mesturas complexas de aromatizantes naturais e artificiais do tipo lima, limón, etc. Arredor de 1880 comezáronse a facer bebidas carbónicas con cola nos EE UU, que contiñan extractos de coca e cola; posteriormente, apareceron algunhas patentes que incluían tamén cafeína e teobromina, que lle dan un valor estimulante. Entre 1884 e 1885 o farmacéutico John Pemberton creou a bebida coñecida como Coca-cola.