coser

1. v t Antónimos: descoser.

   1. Pasar un fío ou un cordel, xeralmente mediante unha agulla, a través dun tecido téxtil, de coiro ou doutro material semellante para xuntar dous anacos, tapar un buraco, suxeitar uns botóns, engadir algún adorno, atar algo nalgún sitio ou realizar calquera labor deste tipo. Na tradición oral recóllense ditos como: “Coser e facer albardas, todo é dar puntadas. En coser e descoser, o fío e o tempo téñense que perder”.

      Ex: Coseulle un botón á chaqueta. As mulleres cosían as redes no peirao todas as mañás.

      Antónimos: descoser. Confrontacións: remendar.
   2. [MED]

      Xuntar os dous bordos dun tecido orgánico mediante puntos de sutura.

      Ex: Chegou coa ferida aberta e levámolo ó hospital para que lla coseran.

   3. [GRÁF]

      Facer a cosedura nunha encadernación.

2. v i

   Realizar labor de costura. Na tradición oral recóllense ditos como: “Cose canto poidas e verás canto aforras”.

   Ex: Cose dende que ten doce anos.

3. máquina de coser [TÉXT]

   Aparato que permite coser con gran rapidez e uniformidade. Está impulsada por un movemento rotativo que pode provir dun motor ou dunha panca, unida a un sistema biela-manivela que acciona o usuario.

Frases feitas

• Coser o aparello con olga. Enmarañarse as redes coas algas debido ao mal tempo.