Instituto Galego da Vivenda e Solo

Organismo autónomo creado pola Xunta de Galicia (1988) encargado da execución da política da vivenda, solo residencial e empresarial, en coordinación coa Consellería de Política Territorial, Obras Públicas e Vivenda. Ten como finalidade controlar a utilización do solo en beneficio do interese xeral e garantir os dereitos constitucionais de residencia digna. Entre as súas funcións destacan a promoción e xestión de plans aprobados desde a Consellería, a realización de estudios sobre oferta e demanda de vivendas e solo, a promoción pública de vivendas de protección oficial e a fixación do réxime de uso, o fomento da mellora e rehabilitación de vivenda rural, a promoción de cooperativas para a construción ou o estudo de novas tecnoloxías e a inspección e control de calidade na edificación.