Mapa Sociolingüístico de Galicia

Traballo de investigación realizado polo Seminario de Sociolingüística da Real Academia Galega en colaboración coa Dirección Xeral de Política Lingüística da Xunta de Galicia entre 1992 e 1996. Para a súa elaboración realizáronse un total de 38.897 entrevistas entre a poboación residente en Galicia de máis de 16 anos de idade. A enquisa constaba de 148 preguntas, algunha delas con subdivisións internas, polo que se obtiveron un total de 170 variables, como a competencia lingüística do galego, as actitudes e prexuízos lingüísticos ou os datos de identificación persoal do entrevistado. O traballo foi publicado pola Real Academia Galega en tres volumes (1994, 1995 e 1996) e nel recóllense datos significativos da situación sociolingüística de Galicia. En xeral, o estudo amosa que os galegos teñen unhas actitudes positivas cara ao galego, especialmente entre os máis novos e os galegofalantes. O galego é a lingua maioritaria do país, malia observarse unha liña de descenso constante no seu uso conforme descende a idade dos informantes. Existen ademais diferencias importantes segundo o hábitat, falándose máis no rural e no interior ca nas cidades e na costa. A lingua inicial dos galegos é maioritariamente o galego pese a que se está a producir unha perda interxeracional na súa transmisión. Por último, o estudo mostra que os galegos teñen, en xeral, unha competencia elevada en galego, excepto as persoas de maior idade nas destrezas escritas.