mari

Relativo ou pertencente aos maris.

Individuo do pobo mari.

Pobo finoúgrio que se estableceu no curso medio do Volga e do V’atka. Estiveron sometidos aos khazaros (s VIII), aos búlgaros do Volga (ss IX-XIII) e aos mongois, ata que, coa caída do khanato de Kazan’ (1552), pasaron a depender dos rusos. Constituíron a República Socialista Soviética Autónoma dos Maris, actualmente República Federal dos Maris, aínda que tamén se asentan na República de Tatarstán, na República dos Udmurtos e en Baxkiria.

Lingua da familia finoúgria do phylum urálico, que se fala en Rusia, principalmente na República Federal dos Maris e en Baxkiria. Distínguense dous dialectos fundamentais: o oriental ou rural e o occidental ou montañés, que, aínda que son mutuamente comprensibles, presentan algunhas diferencias fonolóxicas e léxicas.