Noche, La

Xornal vespertino publicado en Santiago de Compostela a partir do 1 de febreiro de 1946. Subtitulado “Único diario de la tarde en Galicia”, substituíu a El Compostelano (30 de xaneiro de 1946), e continuou a súa numeración. Os dous pertenceron á Editorial Compostela, responsable de que El Correo Gallego e La Noche se fusionasen (1 de decembro de 1967). Un ano despois saíu coa cabeceira de El Correo Gallego (27 de decembro de 1968). Dirixido por José Goñi Aizpurua ata o 1 de marzo de 1960, Raimundo García Domínguez Borobó, José Vidal Iborra e Francisco Leal Ínsua, contou con algúns dos intelectuais máis destacados do momento como A. Fraguas, X. Filgueira Valverde, Couceiro Freijomil, Á. Cunqueiro, Bouza Brey, V. Risco, Varela Jácome, García Bodaño ou Méndez Ferrín. Entre outubro de 1949 e xaneiro de 1950 incluíu un suplemento semanal, titulado La Noche “Suplemento do Sábado”, de carácter literario e económico. Coordinado por F. Fernández del Riego e X. Isla Couto, que asinaron cos pseudónimos de Salvador Lorenzana e Santiago Fernández, respectivamente, a súa tendencia era galeguista e progresista, e incluíu numerosos artigos e ensaios sobre diversas literaturas, entre elas a galega.