pementeiro

Planta herbácea anual, de talo erecto de entre 40 a 120 cm de altura, follas enteiras ovais ou lanceoladas, de cor verde intensa, que se alternan ao longo do talo; flores solitarias, pequenas, brancas e o froito, o pemento, en baga oca. Posúe numerosas raíces adventicias, que poden acadar ata 1 m de profundidade. Para desenvolverse ben necesitan solos lixeiros e con moita materia orgánica, boa luminosidade, drenaxe e un pH próximo ao neutro. É orixinaria de América tropical, e foi introducida en Europa no s XV, e no s XVI xa se cultivaba en España. En Galicia, case o 4% dos cultivos son hortícolas, e deles case 900 Ha son para o cultivo do pementeiro cunha produción dirixida ao autoconsumo e á comercialización. O cultivo do pementeiro en Galicia realízase con distintas variedades segundo as comarcas, como é o caso de Padrón, Arnoia, O Couto, etc.

Terreo cultivado de pementos.