péndulo

Sistema físico formado por un corpo material que oscila arredor dun eixe horizontal que non pasa polo seu centro de gravidade. Co fin de establecer as leis do péndulo, idealizouse o chamado péndulo simple ou matemático, que consiste nun punto material que pende dun fío inextensible e sen peso, fixado nun punto inmóbil. Para oscilacións de pequena amplitude, o movemento do péndulo segue un movemento harmónico simple. No péndulo físico ou real a masa non se concentra nun punto, senón repartida nun certo volume. Presenta dous puntos de suspensión diferentes que lle dan o mesmo período de oscilación, e a distancia entre estes puntos é a lonxitude equivalente do péndulo físico. O péndulo reversible de Kater compórtase coma un péndulo simple de lonxitude igual á distancia entre os dous puntos de suspensión. Coa axuda do péndulo, demóstrase a rotación da terra (experimento de Foucault). O péndulo utilízase como órgano regulador dos reloxos fixos, xa que unha oscilación completa dura sempre o mesmo tempo.

Dispositivo, ideado polo matemático inglés Benjamin Robins en 1742, que permite determinar a velocidade dun proxectil disparado contra el, a partir da desviación que sofre a causa do impacto.

Sistema que está constituído por un sólido suspendido dun fío moi delgado, xeralmente metálico, que oscila arredor do eixe constituído polo fío baixo a influencia da torsión do mesmo.

Electroscopio que está constituído por unha pequena bóla de cortiza ou de sabugueiro, suspendida cun fío de seda. Se se electriza previamente a bóla, ao achegarlle un corpo electrizado será atraída ou repelida por este, cousa que permite detectar o signo da carga do corpo.

Reloxo maxistral que, nos observatorios astronómicos, serve para sinalar o tempo sideral.

Aparato que se utiliza para medir o coeficiente de fricción lonxitudinal dun pavimento.