percebe

Crustáceo cirrípede, da orde dos torácicos, que pertence aos xéneros Lepas, Pollicipes e Scalpellum. Adhírese a un substrato variable mediante un pedúnculo carnoso en que hai unha rexión cefálica, mentres que o resto do corpo está protexido por unhas placas calcarias que forman a coiraza ou cuncha do crustáceo. En Galicia só están presentes as especies Pollicipes cornucopia e Lepas anatifera, pero só a primeira é comestible e obxecto dun comercio activo.

Crustáceo cirrípede que se caracteriza anatomicamente por ter o corpo dividido en dúas partes: capítulo e pedúnculo (comestible). O primeiro está formado por cinco placas calcarias grandes e varias pequenas, e no seu interior está o tórax do animal, con seis apéndices birrámeos sedosos, que libera para filtrar o alimento planctónico da auga. No pedúnculo, recuberto de pel flexible, quitinizado e cuberto en parte con placas para soportar o impacto das ondas do mar, está parte da cabeza e os músculos de fixación; o grosor e lonxitude do pedúnculo depende de onde se desenvolva o individuo. Esta forma anatómica permitiulles colonizar a zona intermareal rochosa, os cantís, etc. Para poder fixarse ao substrato posúen unha glándula, que produce unha sustancia durante toda a súa vida e que lle permite reparar pequenos desprendimentos. Viven en colonias, e o período reprodutor é entre marzo e setembro; son animais hermafroditas, pero a fecundación é cruzada. As larvas son libres e, tras un período, fíxanse ao substrato e perden a capacidade de desprazamento. O seu bo crecemento depende da temperatura, salinidade, nutrientes e densidade da auga. É unha especie moi apreciada comercialmente e a súa extracción está regulada polas confrarías de mariscadores de Galicia, con vedas que se localizan entre os meses de maio e setembro; ademais, para ser comercializado deben superar os 4 cm de lonxitude. Están amplamente distribuídos polas costas do Atlántico Norte, mentres que os percebes máis apreciados do mundo están nas costas galegas (Costa da Morte, cabo Ortegal, Cariño, Cedeira, etc).

Crustáceo cirrípede, de estrutura similar ao percebe, pero con capítulo de placas translúcidas e pedúnculo algo retráctil. É peláxico e dáse no Atlántico Norte, onde se fixa ás barcas e á madeira. Non é apto para o consumo.