Ponte, A

Drama escrito por Manuel Lugrís Freire e estreado pola Escola Rexional de Declamación no Teatro Principal da Coruña o 18 de xullo de 1903. Malia que nun principio non tivo demasiado éxito, co tempo pasou a representarse nalgúns dos principais escenarios galegos. A peza, que consta de dous actos divididos en once e doce escenas, respectivamente, constitúe o abandono do costumismo e do teatro histórico galego para introducirse nun teatro social ou de tese, que procura a concienciación da sociedade. A historia resúmese nun enfrontamento entre labregos e un cacique polas pretensións deste con respecto á muller do campesiño, e onde a ponte representa a ansia de liberdade e o remate da opresión.