Porvenir, El

Revista publicada en Santiago de Compostela a partir do 3 de febreiro de 1845. Cesou o 28 de agosto do mesmo ano (nº14). Subtitulouse “Revista de la juventud gallega” e “Órgano de la Mocedad Gallega”. Baixo a dirección de Antonio Faraldo e co lema “Todo para Galicia. Abajo reglas, escuelas i maestros”, foi unha publicación que defendeu a anarquía literaria e a emancipación do pensamento, dentro dunha militancia progresista e galeguista. Incluíu abundante literatura e serviu de voceiro das ideas máis avanzadas do momento, ademais de loitar pola recuperación do galego como lingua literaria.