Torres Luna, María del Pilar de

(Bayarque, Almería 28.10.1937) Xeógrafa. Doutora en Xeografía pola Universidad de Navarra (1967), en 1968 incorporouse á Universidade de Santiago de Compostela e en 1981 converteuse en catedrática de Xeografía de España. As súas principais liñas de investigación son a xeografía rexional do mundo, a xeografía de Galicia, a xeografía social e das relixións e a xeografía dos asentamientos humanos. Membro dos comités científicos de Estudios Migratorios, Nimbus e A Estrada, das súas obras destacan La Navarra húmeda del Nororeste. Estudio geográfico de la ganadería (1971), Un modelo de encuesta rural para Galicia (1981), Las Parroquias de Galicia: Cartografía y estadísticas (1985), A Montaña galega: o home e o medio (1993), Parroquias y arciprestazgos de Galicia (1994), Geografía de Galicia (2000-2002), que dirixiu, e Estudio Geográfico del Atlas de Lázaro Luis del año 1563. Códice de la Academia as Ciencias de Lisboa (2004). Pertence á Real Sociedad Geográfica, á Asociación de Geógrafos Españoles e, desde 1997 é dama da Orden de Caballeros y Damas del Camino de Santiago.