abrir

1. v t

   Facer accesible aquilo que está pechado ou tapado, levantando, movendo ou extraendo aquilo que o pecha ou tapona (porta, tapa, etc) ou separando dúas partes que están xuntas.

   Ex: Abriron o armario para airealo un pouco. 

   Sinónimos: desfechar, despechar. Antónimos: cerrar, fechar, pechar.
2. v t

   Estender as partes dalgunha cousa de xeito que se incremente o seu tamaño.

   Ex: Para a cea do mércores abriremos a mesa do salón para poder caber todos mellor. 

   Antónimos: cerrar, pechar. Confrontacións: desdobrar.
3. v t

   Desembarazar un conduto que está obstruído.

   Ex: Abriu o paso do rego para que a auga chegase ás leiras das patacas.  

   Confrontacións: desobstruír.
4. v t

   Dar comezo unha actividade, poñer en marcha un negocio.

   Ex: En abril abriron catro novas tendas de Adolfo Domínguez. 

   Antónimos: cerrar, pechar. Confrontacións: inaugurar.
5. v t

   Ser o primeiro dunha sucesión.

   Ex: O abandeirado abría o desfile. 

   Sinónimos: encabezar. Antónimos: cerrar.
6. v t

   Deixar ao descuberto algo, separando as partes que o pechan ou cobren.

   Ex: O neno abriu a man para coller os caramelos. 

   Antónimos: cerrar, fechar, pechar.
7. v t

   Accionar un dispositivo que permita a entrada ou saída dun gas ou líquido.

   Antónimos: cerrar, fechar.
8. v i

   Producirse unha fenda ou abertura.

   Ex: A rocha abriu pola filtración de auga. 

   Sinónimos: fender, gretar, regañar.
9. v i

   Principiar algo as súas tarefas de xeito habitual.

   Ex: Os bancos abren ás oito da mañá. 

   Antónimos: cerrar, pechar.
10. v t [MED]

    Facer unha incisión no corpo dunha persoa ou animal no transcurso dunha intervención cirúrxica.

    Ex: O ano pasado abríronme o corazón e puxéronme dúas válvulas. 

11. v t [AGR]

    Traballar a terra removéndoa.

    Ex: Abriron o campo para logo sementar as cebolas. 

12. v i [BOT]

    Estenderse os pétalos e sépalos dunha flor que permanecían pechados no abrocho.

    Ex: Abriron todas as roseiras que tiña na casa. 

13. v t [CONSTR]

    Facer unha obra con solución de continuidade que permita un novo acceso.

    Ex: Abriron a nova rúa xusto antes das eleccións. 

14. v t [INFORM]

    1. Poñer en marcha unha aplicación.

       Sinónimos: arrincar.

    2. Acceder a un documento.

    3. Acceder por medio da aplicación ou aparello correspondente, á información contida nun soporte informático como un disquete ou un CD-ROM.

15. v t [MAR]

    Ampliar, o calafate, as gretas que hai entre dúas táboas dunha embarcación de madeira para poder introducir a estopa.

    Ex: No estaleiro abriron o casco do veleiro para calafatealo. 

16. v i [METEOR]

    Esvaecer as nubes do ceo despois de estar nubrado.

    Ex: Se abre o día poderemos saír a pasear. 

    Antónimos: cerrar, pechar.
17. v i e pron [PAT]

    Danarse unha articulación a causa dun golpe.

    Ex: Caín na escaleira e abriuseme o pé. 

18. v pron [MAR]

    1. Perder, dúas embarcacións aliñadas na visual dun observador, a súa aliñación de xeito que parece que se separan unha da outra.

       Ex: Ó chegar á boca da ría os dous veleiros abríronse e non podía saber quén ía en primeiro lugar. 

    2. Desagregarse ou romperse as pezas que constitúen o casco dunha embarcación, de xeito que se filtra a auga no seu interior.

       Ex: Abriuse o fondo do barco e foi a pique en poucas horas. 

19. v pron

    Confesar ou revelar a alguén os sentimentos ou pensamentos máis persoais e íntimos.

    Ex: Estaba tan agobiada que se abriu a min. 

20. v pron

    Separarse algo deixando o acceso libre.

    Ex: A fiestra abriuse pola noite por mor do forte vento. 

21. v pron

    Quedar ao descuberto algo despois de desaparecer o que impedía o seu libre acceso.

    Ex: Abríronselle os ollos co susto que levou.

Frases feitas

• Abrir a boca. Bocexar.

• Abrir a man. Ser xeneroso.

• Abrir a mesa. Escampar.

• Abrir a porta e a arca/abrir a porta a manga e a ancha. Recibir cos brazos abertos.

• Abrir a unha cantidade. Nas poxas, comezar a ofrecer prezos por unha cantidade determinada. No póquer, primeira aposta que abre o xogo.

• Abrir ben os oídos. Prestar atención.

• Abrir o tempo. Estiñar.

• Abrir unha conta. Comezar a facer operacións bancarias e económicas cunha entidade ou intermediario financeiro.

• Abrir as terras. Labrar.

• Abrir en canal. Facer unha incisión de arriba a abaixo.

• Abrir fogo. Comezar a disparar contra o inimigo.

• Abrir o día. Amañecer. Ex: No verán o día abre máis cedo ca no inverno.

• Abrirlle os ollos a alguén. Desenganar a alguén advertíndolle sobre algo.

• Non abrir a boca. Permanecer calado, sen falar.