descubrir

1. Quitar aquilo que cobre ou oculta algo ou a alguén. Na tradición oral recóllense ditos como: “Descubrir un altar para cubrir outro é cousa de loucos.”

   Ex: Descubriu a cama para que aireara. As fortes ondas descubriron o cadáver que estaba enterrado na area. 

   Sinónimos: destapar. Antónimos: cubrir.

2. 1. Atopar unha cousa que non se coñecía ou que estaba oculta.

      Ex: Esta foi unha das primeras illas que descubriron os portugueses. Algún día descubrirán a vacina da sida. 

   2. Decatarse de algo que pasara desapercibido ou se ignoraba. Na tradición oral recóllense ditos como: “Escaravellou o galo e descubriu o coitelo que ha de matalo.”

      Ex: Cando limpaba o chan descubriu un billete debaixo do sofá. Un día descubriu que non a quería. 

   3. Atopar unha nova explicación científica ou lei para explicar os fenómenos da natureza.

      Ex: A. Fleming descubriu a penicilina en 1929. 

   4. Aprender algo que non se sabía.

      Ex: O neno descubriu cómo se usaba o garfo. 

3. 1. Mostrar ou dar a coñecer algo que se pretendía manter oculto ou que se descoñecía. Na tradición oral recóllense ditos como: “O fume descobre onde está o lume. O tempo todo o cobre, todo o encobre e todo o descobre.”

      Ex: Sempre descobre todos os segredos que lle confío. Xa descubrín o que traías no paquete. 

      Sinónimos: revelar.

   2. Coñecer a identidade, o paradoiro, as accións ou intencións de alguén que pretendía ocultalos. Na tradición oral recóllense ditos como: “Amor, tos e fogo descóbrense logo.”

      Ex: A policía descubriu onte o asasino. Descubrímolo cando falou da súa familia. Aquelas accións desmedidas descubriron as súas intencións. O seu cómplice descubriuno no xuízo. 

4. Conseguir ver algo ao lonxe con dificultade.

   Ex: Ó chegar ao cume do monte descubriu a cidade. 

   Sinónimos: dexergar, enxergar.

5. Sacar unha persoa unha peza de roupa que cobre o seu corpo.

   Ex: Se ves que vai moita calor descóbrete máis. 

6. Quitar alguén da cabeza o chapeu ou outra peza similar en sinal de respecto ou para saudar.

   Ex: O paxe descubriuse perante o xuíz. 

7. Mostrarse ou darse a coñecer algo que estaba oculto ou que pasara inadvertido.

   Ex: Xa en idade avanzada descubriuse como un poeta excelente. 

8. [DEP]

   Deixar un participante nun combate sen protección unha parte do seu corpo.

   Ex: Descubriuse e o seu contrincante meteulle un gancho que o deixou KO.

Frases feitas

• Descubrir a orella. Deixar ao descuberto os defectos propios.

• Descubrir o peito. Dicir ou contar todo o que se sabe.

• Hai que descubrirse. Expresión que se emprega para expresar a admiración que se sente por algo ou alguén. Ex: Realmente, hai que descubrirse ante a súa oratoria.