acetaldehido

Líquido moi volátil, inflamable, irritante, narcótico e de olor penetrante. Os procedementos de obtención industrial son por deshidroxenación do etanol en fase vapor, oxidación catalítica en fase vapor da mestura propano-butano, hidratación en ambiente sulfúrico diluído de acetileno, con reoxidación posterior e oxidación en solución clorhídrica do etileno. As propiedades químicas do acetaldehido son as xerais dos aldehidos. As súas aplicacións directas son moi limitadas (a principal é o prateado de espellos). A facilidade coa que reacciona e o seu baixo custo fan que sirva de materia prima para a obtención de moitas substancias orgánicas importantes, entre elas: o ácido acético, o anhídrico acético, o n-butanol, o paraldehido e o pentaeritritol. En bioquímica o acetaldehido é tamén un intermediario importante: é un dos elos da oxidación biolóxica dos hidratos de carbono, un produto intermedio da fermentación alcohólica, e é tamén o primeiro produto formado na oxidación polo organismo do alcohol inserido como bebida.

Sólido pouco estable ao aire, soluble en auga, denominado tamén aldehido amoníaco. Obtense por condensación do acetaldehido co amoníaco e emprégase como acelerante de vulcanización e en sínteses orgánicas.