avatar

Cada unha das diferentes fases polas que vai pasando alguén ou algunha cousa ao longo dun proceso no que cambia de forma, opción, manifestación, opinión, partido, etc. OBS: Emprégase xeralmente en plural.

Descenso dunha deidade á terra e posterior encarnación nun home ou nun animal. A doutrina das encarnacións periódicas dos deuses desenvolveuse, sobre todo, na doutrina do deus Vixnu. Nalgúns mitos sobre as orixes hindús, con máis de cinco mil anos de antigüidade, recóllese a idea do renacemento sobre a Terra dun avatar (‘descenso dun deus ao mundo dos homes’) en formas sucesivamente superiores (peixe, tartaruga, verrón, león, home salvaxe dos bosques, anano, o heroe Rama, o cabreiro Krixna e Buda, etc), feito que marca o final dun ciclo de destrución e o inicio dunha nova creación. Os hinduístas, que teñen unha concepción cíclica do tempo, cren que a serie de nove é cíclica ou igual en cada época, e que a humanidade foi creada e destruída en numerosas ocasións.