Banco Africano de Desenvolvemento

Entidade financeira creada en 1963 con sede en Abiyán (Costa de Marfil). En 1999 agrupaba a 77 estados de África, América e Europa. Os seus obxectivos son contribuír ao desenvolvemento económico e ao progreso social dos estados membros, tanto individual como colectivamente. A súa misión é, polo tanto, axudar aos países membros a romper o círculo vicioso da pobreza no que están inseridos. Neste sentido, busca estimular e mobilizar os fluxos investidores, tanto públicos como privados, e asistir tecnicamente aos países membros. O grupo do Banco Africano de Desenvolvemento xoga un papel fundamental, en tanto que institución financeira do desenvolvemento, na loita contra a pobreza.