cabria

Aparello capaz de erguer grandes pesos, empregado na construción e nos portos, para cargar e descargar elementos moi pesados e, antigamente, para arborar os barcos. Está formado por dous mastros, inclinados cara a adiante respecto ao punto de soporte e unidos no extremo superior, de onde colga unha polea. O conxunto mantense firme por medio de cables tensores ou por unha terceira trabe que converxe coas outras dúas. Pode estar fixo nun peirao ou flotante, montado sobre plataformas.

Peza heráldica que ten a forma dun compás aberto, co ángulo no centro do xefe e coas puntas nos ángulos inferiores. Dependendo do lugar que ocupe no escudo recibe diferentes denominacións: baixada, se está nunha posición máis baixa do normal; deitada, se a punta está cara ao flanco destro; deitada contornada, se está cara ao sinistro; fallida, se a súa parte central aparece rota ou desprazada; apuntada, se son dous cabrios invertidos que teñen as súas puntas no centro do escudo.