Cannes, Festival Internacional de Cine de

Festival cinematográfico internacional que se celebra anualmente na cidade francesa de Cannes dende 1939, organizado por Philippe Erlanguer e Favre Bret. A cerimonia inaugural celebrouse no Grand Hotel de Cannes. A Segunda Guerra Mundial interrompeuno ata o 20 de setembro de 1946, data a partir da que se celebrou regularmente. Entre os filmes seleccionados para o programa de apertura destacan La symphonie pastorale (A sinfonía pastoral), de Jean Delannoy, La bataille du rail (A batalla do ferrocarril), de René Clément, e The lost weekend (A última fin de semana), de Billy Wilder. Ao longo dos anos premiáronse coa Palma de Ouro numerosas longametraxes, entre elas: Viridiana (1961), de Luis Buñuel; Il Gattopardo (1963), de L. Visconti; M.A.S.H. (1970), de Robert Alman; Taxi Driver (1976), de Martin Scorsese e The Mision (A Misión, 1986), de R. Joffé. Amais foron galardoados pola súa interpretación actores como: Anthony Perkins, Sophia Loren, Katherine Hepburn, Richard Harris, Vanessa Redgrave, Jack Nicholson, Vittorio Gassman, Fernando Rey, Jack Lemmon, Isabelle Adjani, Ugo Tognazzi, William Hurt ou Marcello Mastroianni. Nel tamén foron premiados algúns dos realizadores máis destacados da cinematografía mundial, entre eles, Robert Bresson, Ingmar Bergman, François Truffaut, Serguei Youtkevitch, John Boorman, Ettore Scola e Wim Wenders.