Castro de Ouro, castelo de

Fortaleza medieval situada no concello de Alfoz. Do castelo, levantado polo episcopado mindoniense na Idade Media, só se conserva a torre da homenaxe. O mariscal Pardo de Cela arrebatoullo ao bispado e, posteriormente, tralo prendemento do mariscal, reconstruíuse para habilitalo como residencia do bispado. No ano 1907, o concello de Alfoz apropiouse da torre e reconstruíuna segundo os planos do arquitecto provincial, Nemesio Cobreros, que a proxectou de acordo coas trazas historicistas inspiradas no románico galego, sobre todo na fachada principal onde a disposición da porta, das fiestras e das ameas tratan de imitar os elementos construtivos do medievo. O edificio, de planta rectangular, e varias das súas alturas destináronse a albergar as dependencias do colexio, do xulgado e do concello de Alfoz. Foi declarado Ben de Interese Cultural en 1994.