concesión

Contrato polo que a administración ou un particular lle cede a outra persoa o dereito de explotación dun servicio público ou doutro tipo de servicio.

Modalidade do contrato administrativo de xestión de servicios públicos pola que o empresario xestiona o servizo asumindo os seus riscos. Como prestación económica ten o beneficio obtido polos resultados financeiros da explotación.

Contrato polo que un empresario (concesionario) se compromete a comercializar nos seus establecementos os produtos doutro empresario industrial ou comercial (concedente) nunhas condicións determinadas e por un tempo concreto ou indefinido. O concesionario mantén o dereito en exclusiva da revenda dos produtos do concedente. Se o contrato inclúe a exclusiva de marca e a asistencia técnica do produto recibe o nome de franchising ou contrato de franquicia.

Negocio xurídico polo que se outorga a un particular o dereito de uso privativo ou o uso anormal do dominio público.

Contrato administrativo polo que a administración encarga a realización dunha obra pública a outra persoa á que lle ofrece como compensación económica a explotación do uso da obra pública. Pode engadir ou non unha achega económica en forma de subvención.

Convenio internacional polo que un estado cede a outro o exercicio efectivo da soberanía sobre unha parte do seu territorio, aínda que conserva a soberanía teórica, por un tempo determinado e a cambio dun canon. Normalmente, o estado cesionario ten o dereito de establecer e desenvolver a súa actividade comercial baixo a protección da propia autoridade. Esta figura caeu en desuso.