Haia, Convencións da

Acordos relativos á guerra que resultaron das conferencias internacionais que tiveron lugar na Haia en 1899 e 1907. A primeira reunión (maio-xullo de 1899), convocada polo Tsar Nicolao II, acolleu representantes de 26 países, regulou a guerra marítima, terrestre e aérea, e creou un tribunal permanente de arbitraxe para resolver os litixios internacionais, constituído en 1901, con sede na Haia. Na segunda conferencia (xuño-outubro de 1907), coa asistencia de 44 estados, revisaron os acordos de 1899, e estableceuse que o inicio de hostilidades tiña que ir precedido por unha declaración de guerra. As dúas guerras mundiais manifestaron a ineficacia destes acordos.