¹ saber

1. v t

   1. Ter noticias, coñecemento ou información de algo.

      Ex: Aínda non sabe o escrutinio.

      Sinónimos: coñecer, coñecer.

   2. Estar instruído nunha materia ou ter coñecementos verídicos de algo.

      Ex: O meu irmán sabe moitas matemáticas.

   3. Aprender de memoria.

      Ex: Xa sabe a lección.

2. v t

   Ter capacidade, habilidade ou destreza para facer algo.

   Ex: Xa sabe andar en bicicleta.

3. v t

   Ser consciente de algo.

   Ex: Esa rapaza non sabe o que fai.

4. v t

   Ter certeza dunha cousa.

   Ex: Sabía que ía reaccionar así.

5. v i

   Ter coñecementos ou información de algo.

   Ex: Sabe moito de cine.

6. v i

   Ser capaz de adaptarse ou comportarse da maneira que se expresa.

   Ex: Cando quere sabe calar.

7. v i

   Ser astuto e sagaz.

   Ex: Ese fillo teu sabe máis ca o demo.

8. v i

   Ter sabor.

   Ex: Esa carne sabe mal.

Frases feitas

• A saber. Frase coa que se introduce a explicación de algo que se acaba de citar.

• Non saber onde se meter. Sentir vergoña.

• Saber a pouco. Gustar ou interesar algo tanto que queden ganas de máis.

• Saber latín. Ser moi agudo e perspicaz.

• Saber que rabia. Gustar moito unha comida ou unha bebida.

• Saber un por onde pisa/anda. Coñecer ben o asunto do que se trata.

• Vai ti saber. Expresión de dúbida sobre unha cousa.

Refráns

• Ben sei o que digo, cando pan pido.
• Cada un sabe onde lle doe e onde lle proe.
• Máis sabe o louco na súa casa có cordo na allea.
• Máis sabe o parvo na súa casa có cordo na allea.
• Máis sabe o tolo na súa casa, có cordo na allea.
• Non hai peor saber có non querer.
• Quen sabe ir dereito á súa casa, a ninguén pregunta as señas.
• Teñas moita sorte e o saber pouco che importe.