Fervenza do Xallas

Cadoiro do río Xallas na súa desembocadura na ría do Ézaro, no lugar do Cadoiro, no límite entre as parroquias (e concellos) do Pindo (Carnota) e do Ézaro (Dumbría). É o único río do continente europeo que desemboca nun cadoiro. A fervenza prodúcese por mor da resistencia á erosión do Monte Pindo, litoloxicamente un batolito de granito de biotita, que o caudal do río non é capaz de desgastar. A construción do encoro de Santa Uxía privou o curso do seu caudal, deixando o leito seco, sen respectar o caudal ecolóxico mínimo legalmente establecido. En agosto de 2000 a compañía titular da presa accedeu a proporcionar caudal ao río durante o mediodía de todos os domingos.