baleirar

1. v t

   Deixar sen nada dentro algún receptáculo sacando o que contén.

   Ex: Baleira unha ampola no vaso. Baleiramos a piscina onte pola mañá. 

   Sinónimos: baldeirar, desocupar, librar. Antónimos: encher.
2. v t

   Deixar baleiro un lugar facendo saír o que hai dentro ou abandonándoo.

   Ex: Os policías baleiraron o local. 

   Sinónimos: baldeirar, desaloxar, desocupar, evacuar. Antónimos: encher.
3. v t

   Sacar algunha cousa dun receptáculo.

   Ex: Baleiramos a roupa do armario, pero deixamos a que estaba nos caixóns. 

   Sinónimos: desocupar, librar.
4. v t

   Verter o contido dun recipiente.

   Ex: Baleirou a prata coas patacas dentro da ola. 

5. v t

   Formar un obxecto deitando metal fundido ou calquera outra materia branda dentro dun molde baleiro.

   Ex: Tes que axudarme a baleirar o molde da lancha. 

6. v t

   Practicar un baleiro nun sólido.

   Ex: Botou moito tempo baleirando o zoco. 

7. v t

   Sacar datos dun escrito.

   Ex: Baleirou diversos dicionarios coa finalidade de compilar todos os nomes de minerais. 

8. v pron

   Quedar algunha cousa sen contido.

   Ex: Cando chegas dos adestramentos baléirase o frigorífico. 

9. v pron

   Saír o contido dun recipiente na súa totalidade.

   Ex: Tapaches mal a bañeira e xa se baleirou. 

10. v pron

    Facerse unha cavidade no interior dalgunha cousa.

    Ex: O tronco da maceira vella baleirouse. 

11. [INFORM]

    Acción que se pode executar en sistemas operativos que traballen nun contorno gráfico de ventás como Mac OS ou Windows, para eliminar un documento ou aplicación, ou un conxunto deles, que previamente foran seleccionados e introducidos nun directorio denominado papeleira.

Frases feitas

• Baleirar o papo. Dicir todo o que se pensa dun determinado asunto. Ex: Calou moito, pero ao final baleirou o papo.