armar

1. Antónimos: desarmar.
   1. v t

      Fornecer algo ou a alguén de armas ofensivas ou defensivas.

      Ex: Antes de que se produza o ataque, debemos armar a tropa de fusís.

      Antónimos: desarmar.
   2. v pron

      Proverse de calquera utensilio para usalo como arma.

      Ex: Cando nos intentaron roubar, armámonos cos paos que atopamos no camiño.

2. v t

   Cargar unha arma.

   Ex: Armou o rifle e disparou aínda que non puido alcanzar o branco.

3. 1. v t

      Poñer en armas, preparar para a guerra.

      Ex: Armaron oitenta homes ben pertrechados para o combate corpo a corpo.

   2. v pron

      Tomar armas, prepararse para a batalla.

      Ex: Todo o mundo se armou para defender a vila contra o inimigo.

4. v t [MAR]

   Abastecer especialmente un barco de todo o que é necesario.

   Confrontacións: equipar, prover.
5. v t

   Unir as diferentes pezas das que se compón un obxeto ou un aparato e poñelo en disposición de funcionar.

   Ex: Armei unha librería co meu irmán Alex nunha mañá.

   Sinónimos: montar. Antónimos: desarmar. Confrontacións: ensamblar.
6. v t

   Facer unha trampa para animais.

   Ex: Todo o mundo se ría de nós por querermos cazar o xabarín armando unha trampa, pero ó final conseguímolo.

7. v t

   Planear unha intriga contra alguén.

   Ex: Non son moi amigas e ármanse enredos entre si.

   Sinónimos: argallar.
8. v t

   Dar orixe a algunha cousa.

   Ex: Armaron rebumbio e a policía obrigoulles a pechar o local.

   Sinónimos: organizar, formar, montar.
9. v t

   Prover a alguén do que precisa.

   Ex: Cando casaron o pai del armoulles a casa.

10. v i

    Semellar cara ou boa unha cousa pola súa aparencia.

    Ex: Meteu un trasto no escaparate tan ben postiño que armaba.

11. v pron

    Ter lugar, especialmente un lío, un alboroto ou unha pelexa.

    Ex: Berroulle ó camioneiro e armouse unha liorta. Tropezou con el e xa se armou.

12. v pron

    Disporse para afrontar algunha cousa.

    Ex: Para elaborar unha enciclopedia hai que armarse de paciencia. Para ser soldado hai que armarse de coraxe.

13. v t [CONSTR]

    Colocar a armazón de ferro dun elemento de formigón armado.

14. v t [PESCA]

    Acción de unir os diversos panos de rede compoñendo un tecido ou unha arte de pesca a partir de diferentes pezas que deben ser conxuntadas e entrelazadas debidamente. Realizada por empregados experimentados, a causa da súa complexidade e da responsabilidade que implica manexar este útil de traballo, ten un valor moi elevado no mundo da pesca tradicional.

15. armar cabaleiro [HIST]

    Cerimonia pola que un aspirante era nomeado cabaleiro, e que consistía esencialmente no cinguimento da espada ao neófito polo padriño e no golpe que este coa palma da man lle daba na caluga ou na meixela. A cerimonia, característica da estrutura feudal franca da Alta Idade Media aparece mencionada desde a segunda metade do s XI. No s XIII chegouse á plenitude do cerimonial.

Frases feitas

• Armala axiña. Idear argalladas rapidamente.

• Armar a pasma. Estar pasmando.

• Armar ao melro. Buscar o perigo.

• Armar ao merlo/ pancho. Meterse en problemas.

• Armar batifondo. Facer ruído.

• Armar un baturrillo. Facer un rebumbio, unha lea.

• Armar unha tramoiada. Argallar algo.

• Armarlla con queixo a alguén. Atraer alguén con enganos.

• Armarlle a gaiola a alguén. Poñerlle unha trampa.

• Armarse de valor. Facerse forte.

• Armarse o trono. Haber síntomas de tormenta.

• Armarse unha rebodaina. Formarse un gran rebumbio.