Atlas

Nome dunha serie de mísiles balísticos intercontinentais norteamericanos, que foron empregados tamén para lanzamentos espaciais. Existiron diferentes modelos, que levan letras indicativas: D, E e F. O primeiro voo tivo lugar en cabo Canaveral en 1957, e foi declarado operacional na versión Atlas D na fin de 1959. As configuracións E e F entraron en servizo no período 1961-1962. Os mísiles Atlas, retirados do servizo en 1964-1965, foron substituídos polos Minuteman e Titan. O Atlas, modificado convenientemente, serviu como foguete lanzador para os voos orbitais Mercury. O conxunto Atlas-Agena B serviu para lanzar as primeiras sondas espaciais Ranger e Mariner, e o Atlas-Agena D para o Lunar Orbiter. O Centaur foi especialmente concibido para o Atlas, sistema que se utilizou no lanzamento da sonda lunar Surveyor III e nos Mariner 6 e 7. Os Atlas levan motores de propergol líquido (hidrocarburos RP-1 como combustible, e osíxeno líquido como comburente).