cansar

1. v t

   Reducir considerablemente a forza dunha persoa ou dun animal, a causa dun esforzo, dun traballo ou doutra actividade. Na tradición oral recóllense ditos como: “Cansa quen dá, que quen pide non cansa nin cansará. Non hai cousa que máis canse có traballo; mais tamén adoita cansar o moito ”.

   Ex: Cánsame moito subir as costas.

   Sinónimos: fatigar. Confrontacións: esgotar.
2. v t

   Causar desagrado unha cousa ou alguén que se repite moito ou carece de interese.

   Ex: Cánsanme as túas teimas.

   Sinónimos: aborrecer, aburrir, encher, enfastiar, fartar.
3. v t e i

   1. Esgotar ou esgotarse a fertilidade da terra.

      Ex: Os eucaliptos cansarán os montes das Rías Baixas. A terra cansa se non se esterca nin se sacha.

   2. Deixar de botar auga un manancial.

      Ex: A sequía cansou as fontes da vila.

4. v i e pron

   Sentir unha diminución da forza debido a algún tipo de actividade.

   Ex: Cansáronse de estar todo o día de pé.

5. v i e pron

   Experimentar desagrado por algo ou alguén que é repetitivo ou que carece de interese.

   Ex: Cansámonos de ter que aturalo todos os días.

Frases feitas

• A gaita non cansa máis que a quen a toca. Cadaquén sabe o esforzo que pasa co seu traballo.