"AP" (Contén)

Cada unha das agrupacións macromoleculares, bastante complexas, que incesantemente se forman no citoplasma. Teñen propiedades físicas e químicas totalmente diferentes ás dos seus constituíntes. Distínguense as lipídico-protídicas e as glicídico-protídicas.

Xénero de herbáceas gabeadoras anuais, da familia das papaveráceas, de talos de ata 1 m de lonxitude, látex acuoso e follas bipinnatisectas rematadas en gabián. As flores, dispostas en acios, son brancas, tubulares e bilabiadas, con dous sépalos diminutos, dous pétalos externos con espora, dous pétalos internos estreitos e dous estames trilobulados. Os froitos son cápsulas oblongas de ata catro sementes. En Galicia é común a especie C. claviculata en valados e bosques húmidos.

Fillo que nace en último lugar e con diferenza de anos con respecto aos outros irmáns.

Antiga cidade de Asia menor que se corresponde coa actual Kayseri. Núcleo da cultura capadocia, desenvolvida no II milenio a C, converteuse en capital da Capadocia romana. O Emperador Tiberio concedeulle o nome de Cesarea en honor de Augusto. Saqueada polo Emperador sasánida Sānpūr I no s III d C, durante a centuria seguinte foi un dos principais centros cristiáns. Os turcos selxúcidas conquistárona no 1070.

Sistema político no que o poder civil, co control e servizo do poder relixioso, intervén nas cuestións disciplinarias e teolóxicas. Foi combatido pola Igrexa Católica, en especial polos papas Gregorio VII, Inocencio III e Bonifacio VIII.

Changwat de Tailandia, na Rexión Nororiental (12.778 km2; 1.086.726 h [estim 1993]). A capital é Chaiyaphum (23.400 h [1993]).

Rito tántrico do hinduísmo, traducido por culto do círculo, no que un reducido número de homes e mulleres se reúnen para participar nun banquete cultural que finaliza co acto sexual.

Nome do concello de Silleda dende a súa constitución oficial o 24 de decembro de 1836 ata o 2 de maio de 1853, data na que o mudou polo actual. Tomou esta denominación porque, na súa orixe, a capital municipal era o lugar de Chapa, na parroquia homónima. Por petición do alcalde, o 9 de abril de 1838, o gobernador civil autorizou o traslado da capitalidade ao núcleo de Silleda. Isto provocou unha disputa entre veciños das distintas parroquias do municipio, que defendían os seus respectivos intereses tomando partido por unha ou outra localidade. Finalmente, o traslado da capitalidade rematou por significar tamén, quince anos despois, o cambio da denominación do concello.

Situada en Silleda, foi construída no s XIII polos señores de Deza. Sufriu o sitio de Berenguel de Landoira en 1320 e pasou a mans do cabido santiagués ata que os señores de Altamira a recuperaron e reclamaron o dereito de sucesión dos Deza. As Revoltas Irmandiñas deixaron pegada na fortaleza e, durante as loitas revolucionarias de 1846, o xeneral Rubín pasou a noite nela. Foi declarado Ben de Interese Cultural en 1994.

Pavimentar unha vía co procedemento da chapacuña.

Golpe dado coa palma da man.

Xénero de mapaches da familia dos prociónidos de ata 1,5 m de lonxitude. Propio de finais do Plioceno, os seus hábitos e aspecto son semellantes ao panda xigante. Os xacementos principais están localizados en Arxentina.

Materia bituminosa de cor escura, líquida ou semilíquida a temperatura ambiente, e de composición variable, que se obtén por destilación de materiais vexetais ou carbonáceos. Emprégase para calafatear embarcacións, na construción de estradas e na fabricación de colorantes, polímeros plásticos, caucho, perfumes sintéticos, produtos farmacéuticos, tecidos sintéticos e explosivos.