Clitocybe

Xénero de fungos de cogomelos grosos, con láminas decorrentes ou inclinadas cara a abaixo, de cor clara e sombreiro normalmente afundido no centro. En Galicia están presentes as especies: C. caerussata, de cogomelos de cor branca ou crema e sombreiro de ata 5 cm de diámetro, presente en bosques e prados, e tóxica para o home; C. costata, de cogomelos de cor parda clara, coa marxe do sombreiro ondulada, con cheiro a froitas, que vive baixo coníferas e que é comestible; C. dealbata, de cogomelos de cor crema e cheiro a fariña, co sombreiro de ata 3 cm de diámetro -máis ou menos aplanado e coa marxe curvada cara a dentro-, presente en prados, e tóxica para o home; C. gibba, de cogomelos con forma de funil que acada os 8 cm de diámetro, cunha cor que vai dende alaranxada a parda e cheiro a herba seca, que aparece baixo árbores caducifolias e que é comestible; C. nebularis, de cogomelos de ata 16 cm de diámetro, de cor parda e co pé engrosado na base, que vive baixo árbores caducifolias e que é comestible; e C. odora, de cogomelos de ata 7 cm de diámetro, un pouco afundidos no centro, de cor verde clara e cun forte cheiro a anís, que vive en bosques -frecuentemente de árbores caducifolias-, e é apta para o consumo.