club

Sociedade ou asociación de persoas con intereses, afeccións ou ideoloxías comúns. Xeralmente, os socios pagan unha cota para poder ser membros e, nalgúns casos, a admisión pode estar restrinxida. Os primeiros clubs apareceron en Inglaterra; o Bread Street Club de Londres naceu no s XVI e entre os seus membros estivo William Shakespeare. Non obstante , acadaron relevancia ao longo do s XVIII. Estas sociedades eran fundamentalmente masculinas e ata finais do s XIX non se permitiu o ingreso de mulleres. Destacaron os clubs literarios, como o Kit Cat Club, e os políticos, como o Brooks (whig) e o White (tory). Xa no s XIX apareceron, entre outros, os clubs deportivos, universitarios, militares e excursionistas, que aínda manteñen unha importancia relevante na vida social inglesa. No continente europeo predominaron os clubs de carácter político. Na Francia revolucionaria do s XVIII existiron clubs políticos de diferentes tendencias como os Cordeliers, os Feuillants ou os Jacobins, que desenvolveron unha importante función político-revolucionaria. No s XIX existiron clubs políticos en España, como o Club da Esperanza da Coruña, que acollía aos liberais e vinculado á masonería. No s XX os clubs sociais chamáronse círculos, mentres que a denominación de club referiuse aos deportivos.

Lugar onde se reunen as persoas que forman parte dunha asociación para falar, xogar ou realizar calquera actividade.