comisario -ria

Persoa que recibe a autorización para exercer funcións de mando ou negociación por delegación dunha autoridade superior.

Funcionario de policía que exerce como xefe dunha comisaría, encargado de manter a lei e a orde nunha zona determinada.

Membro da Comisión Europea encargado dunha determinada parcela da política comunitaria e designado polo goberno de cada país membro da UE, nun número proporcional ao conxunto dos seus habitantes. Nomeado por cinco anos, pode ser renovado no seu cargo.

Persoa designada por un xuíz, nun procedemento de execución colectiva de creba, para vixiar e inspeccionar as operacións dos síndicos sobre a masa da creba, examinar as contas, presidir as xuntas de acredores e asesorar o xuíz sobre o desenvolvemento do procedemento.

Xefe do corpo de intervención militar encargado de diversas funcións de intendencia. A súa categoría equivale á de tenente coronel, cando é de primeira clase, e á de comandante, cando é de segunda.

Membro do goberno da Rusia revolucionaria con poder executivo, que tiña ao seu cargo unha comisaría ou departamento, á maneira dun ministro. O goberno resultante da Revolución Rusa substituíu o título de ministro polo de comisario, pero posteriormente volveuse á antiga denominación.

Figura que representa os intereses dun partido político e que ten como función principal a educación política dos membros dunha determinada organización militar nas tarefas sociais e políticas da guerra revolucionaria. Ten a súa orixe na Revolución Rusa de 1917 e o concepto adoptárono tanto os partidos esquerdistas occidentais como os movementos insurreccionais latinoamericanos ou orientais. Durante a Guerra Civil española xurdiron de maneira espontánea nas columnas de milicianos da zona republicana e adquiriron carácter oficial co Decreto do goberno de Largo Caballero, do 16 de outubro de 1936.

Persoa en quen o testador delegaba a facultade de facer testamento no seu nome ou de distribuír ao seu arbitrio o caudal hereditario. O Código Civil español de 1995 prohibe o testamento por comisario.

Cargo eclesiástico creado pola monarquía hispánica en 1509 (de maneira definitiva en 1534). Encargábase da publicación da bula da Cruzada, presidía o Consello da Cruzada e administraba as esmolas recadadas. Desde o Concordato de 1851, as súas funcións exerceunas o arcebispo de Toledo.