¹ legado

Disposición por causa de morte que implica unha adquisición de bens a título particular, a diferenza da institución de herdeiro, que supón sucesión a título universal. A persoa favorecida con legado chámase legatario. Os tipos principais de legado son o legado de dominio, que atribúe ao legatario a propiedade dos bens ou dereitos reais ou de crédito, propios do testador, e o legado de crédito, que impón ao gravado efectuar unha determinada prestación a favor do legatario.

Legado que atribúe ao legatario a facultade de esixir ao gravado a adxudicación de bens do activo hereditario líquido polo valor correspondente á cota sinalada polo testador. Non sendo herdeiro, o legatario de parte alícuota non responde como debedor das débedas hereditarias e só pode esixir o importe líquido da parte da herdanza que lle corresponde, que non debe percibir necesariamente en bens hereditarios, senón que o herdeiro pode optar por pagala en cartos.