cuspir

1. v i

   Expulsar saliva da boca. Na tradición oral recóllense ditos como: “Cuspín ao ceo e caeume na cara. Onde moitos cospen, lama fan. O que mal cospe, en si o ve. Quen mal cospe, dúas veces se limpa. Quen ao ceo cospe, na cara lle cae.”

   Ex: Cuspiulle na cara. Cuspiu porque a saliva lle sabía a fel. 

   Sinónimos: chuspir.
2. v t

   Expulsar algo que se ten na boca.

   Ex: Cando come cereixas sempre cospe as croias. 

   Sinónimos: chuspir.
3. v t

   Botar unha cousa algo que ten no seu interior.

   Ex: O volcán cuspía a lava con moita intensidade.

   Sinónimos: chuspir.

Frases feitas

• Cuspir alto. Gabarse de máis por algo. Ex: Non cuspas tan alto que non eres tan bo como pensas.

• Cuspir ao ceo. Botar soberbias.

• Cuspir nun. Tratar mal a alguén física ou moralmente.

• Cuspirlle na cara a un. Dicirlle a alguén algo directamente, sen andar con rodeos.

• Facerlle cuspir algo a alguén. Facer que alguén diga algo que quere ocultar.