academia

Sociedade literaria, artística ou científica, xeralmente fundada e regulamentada por unha autoridade pública coa finalidade de contribuír ao avance das letras, das artes ou das ciencias. No Renacemento, especialmente en Italia, inspirándose no ilustre nome da Academia de Platón e na idea que dela se tiña por medio dos Diálogos, xurdiron as primeiras academias modernas: a Academia Platónica, de Florencia, de carácter filosófico; a Academia Romana (chamada tamén Pomponiana), de carácter arqueolóxico e filolóxico; a Academia Afonsina (chamada despois Pontaniana), de Nápoles; e a Academia Aldina, de Venecia. O s XVII presenciou o nacemento e o afianzamento dalgunhas das academias de máis transcendencia cultural: a Accademia della Crusca, de Florencia (1582); a Fruchtbringende Gesellschaft, de Weimar (1617); a Académie Française, de París; e, sobre todo, as primeiras dedicadas ás ciencias: Accademia Nazionale dei Lincei, de Roma (1603); a Academia Naturae Curiosorum, de Schweinfurt (1652); a Accademia del Cimento, de Florencia (1657); e a Royal Society, de Londres (1662). No s XVIII continuou a expansión do movemento académico, que polo xeral seguiu o modelo francés, como é o caso da Real Academia Española, de Madrid (1714). Durante os ss XIX e XX os países que accederon á independencia e, en ocasións, as nacións sen estado con reivindicacións nacionalistas, foron constituíndo, segundo o exemplo europeo, tanto academias de carácter xeral como especializadas. Nestas condicións, a primeira academia que se fundou en España foi a Real Academia Galega (1906), seguida polo Institut d’Estudis Catalans (1907) e a Euskaltzandia (1919). As principais academias xerais e de corte humanista están asociadas á Unión Académica Internacional (1919). As academias, despois de ter cuberto unha función importante no desenvolvemento do coñecemento, foron substituídas por outras institucións científicas máis axeitadas ao ritmo de incremento e aos métodos do coñecemento científico moderno, pervivindo deste xeito moitas delas como entidades honoríficas.

Sociedade cultural.

Lugar no que os académicos se reúnen para realizar as súas xuntanzas.

Xunta de académicos, sesión académica.

Reunión ou certame de carácter filosófico, teolóxico, científico, literario, artístico, conmemorativo, etc.

Institución de ensino artístico, técnico, mesmo xeral, de nivel superior ou medio.

Institución, especialmente de carácter privado, dedicada ao ensino de nivel medio de carácter técnico e práctico, sen conferir títulos oficiais. Como consecuencia da publicación do Tractate of Education de Milton (1644), os puritanos ingleses fundaron institucións de ensino medio chamadas academias (academies) de tipo máis popular ca as escolas de gramática (grammar schools) anglicanas, coas que se fundiron. Estas institucións pasaron a Nova Inglaterra e ao resto das colonias británicas en América do Norte. Paralelamente desenvolvéronse institucións similares en Europa e no resto do mundo. De carácter privado, público ou semipúblico, ofrecen un ensino variado que abrangue materias principalmente comerciais e de cultura xeral (contabilidade, idiomas, taquigrafía, mecanografía, debuxo e outros).

Impropiamente, universidade, estudo xeral (studium generale).

Circunscrición administrativa francesa de educación. A capital de cada academia ten universidade.

Sociedade constituída para o estudo da música e a difusión de obras musicais mediante concertos, recitais, representacións ou a docencia. As academias musicais teñen a súa orixe nas academias do Renacemento. A partir do s XV comezaron a crearse as especificamente dedicadas á música. En Italia foron importantes a Accademia degl’Incandenati (1500) e a Accademia Filarmonica (1543 e 1545), ambas situadas en Verona, remataron fusionándose en (1564); en Florencia, a Accademia ou Camerata Fiorentina, fundada por Giovanni Bardi (1568); en Venecia, a Accademia della Fama (1558); en Arezzo, a Accademia dei Discordi (1623); en Roma, a Accademia di Santa Cecilia ou Congragazione dei Musici di Roma, que aínda subsiste, a Accademia degli Accesi e a Accademia dei Filomusi; en Ferrara, a Accademia degl’Intrepidi (1600). En Francia fundouse a Académie Royale de Musique, de París (1669) e posteriormente denominada Académie Nationale de Musique. En Alemaña, a Sozietät der Musicalischen Wissenschaften, de Leipzig.

conservatorio.