araucaria

Nome que reciben as árbores do xénero Araucaria, da familia das araucariáceas, presentes en América do Sur e Oceanía. Poden acadar os 50 m de altura e presentan pólas verticiladas, ramificación radial, follas persistentes de sección plana ou trígona, picantes e imbricadas, e piñas de gran tamaño. En Galicia pódense atopar como ornamentais as especies: A. angustifolia, de pólas secundarias só no extremo das primarias; A. araucana, de follas imbricadas e piñas de ata 18 cm de longo; A. bidwinlii, de follas lanceoladas e bicudas, e piñas de ata 30 cm de longo e A. heterophylla de pólas en verticilos pentámeros e piñas de ata 10 cm de longo.