saír

1. v i

   1. Pasar algo ou alguén de dentro dun lugar para fóra.

      Ex: Saíu da bañeira e esvarou.

   2. Irse algo ou alguén dun lugar a outro.

      Ex: Saímos mañá para Lisboa.

   3. Marchar dun lugar nun momento determinado.

      Ex: O tren sae ás catro e media.

2. v i

   1. Ir a lugares de diversión e entretemento.

      Ex: Este sábado saímos en Vigo.

   2. Manter unha relación sentimental ou de amizade con alguén.

      Ex: Miña tía saíu co panadeiro.

      Sinónimos: andar, andar.
3. v i

   Deixar de estar nunha situación determinada.

   Ex: Sairemos deste problema.

4. v i

   Ter unha persoa semellanza con algún familiar do que descende.

   Ex: María sae a seu pai.

5. v i

   Nacer ou comezar a xurdir algo.

   Ex: Este ano os allos saíron con moita forza.

6. v i

   1. Aparecer ou presentarse.

      Ex: Saíu da nada. Non sei de onde saen tantos problemas.

   2. Manifestarse un astro no ceo.

      Ex: O Sol sae polo leste.

   3. Aparecer nunha publicación ou medio de comunicadión.

      Ex: Saístes o domingo na prensa.

7. v i

   Ser levado fóra.

   Ex: Estes libros nunca saíron da biblioteca.

8. v i

   Dicir ou facer algo de xeito inesperado.

   Ex: Saes con cada disparate!

9. v i

   Resultar da maneira que se expresa.

   Ex: Saíu todo o que nos dixo.

10. v i

    Dar co resultado correcto.

    Ex: Non me saen os cálculos.

11. v i

    1. Tocar a unha cantidade nunha repartición. OBS: Constrúese seguido da prep a.

       Ex: Saímos a trinta euros por cabeza.

    2. Custar algo unha determinada cantidade de diñeiro. OBS: Constrúese seguido da prep a.

       Ex: As camisas saen a vinte euros.

12. v i

    Desaparecer unha mancha.

    Ex: A graxa sae moi mal da roupa.

13. v i

    Resultar elixido por sorteo ou votación.

    Ex: Sairía elixido se se presentase.

14. v i

    Ir dar unha rúa ou outra vía ao sitio que se indica.

    Ex: Este camiño sae á praza.

    Sinónimos: desembocar.
15. v i

    Sobresaír de maneira apreciable para fóra.

    Ex: O balcón sae moito da fachada.

16. v i

    Ser o primeiro en xogar.

    Ex: Nesta partida saio eu.

17. v i

    Desbordar por fóra do lugar en que algo está contido.

    Ex: O leite saíu do cazo.

    Sinónimos: rebordar, redundar, reverter.
18. v i

    Ter algo a súa orixe no que se expresa.

    Ex: As palabras saíanlle do corazón.

19. v i

    Alcanzar a alguén que vai diante, collendo por outro camiño.

    Ex: Vai indo, eu sáioche logo no semáforo.

20. v i

    Presentarse unha oportunidade de mellora.

    Ex: Saíulle un traballo en Londres.

Frases feitas

• Saír a ben/a mal con alguén. Acabar amigado ou non con alguén.

• Saír ao paso. Aparecerlle a alguén no camiño.

• Saír coa súa. Conseguir alguén impor a súa opinión ou vontade.

• Saír de ton. Actuar alguén con malas maneiras.

• Saír dun souto e meterse noutro. Empeorar unha situación.

• Saír dun. Facer algo por vontade propia.

• Saír o día/saír o Sol. Amencer.

• Saír por alguén. Defender a alguén.