Vigo, provincia de

Antiga demarcación territorial do estado español con capital na cidade homónima. Comprendía o litoral atlántico e o seu traspaís entre o curso do río Ulla, que marcaba o seu límite setentrional, e o río Miño, fronteira hispanolusa, que a delimitaba polo S; o límite oriental correspondíase cos cumios da Dorsal Occidental Galega nese interfluvio: a serra do Farelo, a serra do Faro, os montes do Testeiro, a serra do Suído e a serra do Faro de Avión. Incluía os partidos de Bemposta, Caldas de Reis, Cambados, A Cañiza, Lalín, A Lama, Pontevedra, Ponteareas, Redondela, Tui e Vigo. O primeiro precedente desta demarcación foi o proxecto bonapartista da prefectura de Vigo. A provincia de Vigo permaneceu vixente desde o 13 de xullo de 1821 a novembro de 1823. A reorganización provincial de 1833 recuperou esta demarcación, pero trasladou a súa capital a Pontevedra, cidade que deu nome á provincia. Nun decreto do 26 de maio de 1836 o goberno ordenou trasladar a Vigo a capitalidade, pero a reacción pontevedresa evitou que o traslado se consumase. Na Revolución de 1840 estableceuse por orde do capitán xeneral de Galicia unha nova provincia de Vigo, que comprendía o interfluvio delimitado ao N por Ponte Sampaio, na desembocadura dos ríos Verdugo e Oitavén, ao S polo curso do río Miño, e ao L pola serra do Suído, a serra do Faro de Avión e os montes da Paradanta e que incluía o territorio dos partidos de Vigo, Tui, Ponteareas, Redondela e A Cañiza. Estivo en vigor entre o 10 de outubro e o 6 de novembro.