"RL" (Contén)

Pequeno arquipélago granítico situado fronte ás costas portuguesas e integrado por máis de medio cento de illas e illotes. Atópase entre 10 e 18 km ao NO do cabo Carvoeiro (Peniche), e distínguense en tres grupos: o das Berlengas, as máis próximas ao continente, integrado pola Berlenga Grande e as illas que a rodean: Serro da Velha, Maldito, Soldado, Fortaleza, etc; as Estelas, 1,7 km ao O da Berlenga, formadas polos illotes: Estela, Estalão, Manuel Jorge, Parados, Todo o Peixe e Medas; por último: as Farilhões, case 7 km ao NO da Berlenga Grande, na que destacan a Farilhão Grande, a Farilhão do Norleste, a Farilhão dos Olhos, a Farilhão da Cova e o Rabo de Asno. A única illa habitada do conxunto é a Berlenga Grande, onde existe unha pequena aldea de pescadores, ademais do farol, atendido polo servizo de faroleiros. Dende 1981 constitúen unha reserva natural (Decreto Lei nº 264/81 do 3 de setembro), tanto por ser lugar de cría de diferentes aves mariñas (como a pardela cinsenta, o corvo...

Empresa automobilística francesa fundada en Lyon (1894) por Marius Berliet. Desde 1967 quedou estreitamente vencellada á empresa Citroën. Na súa orixe fabricaba automóbiles e camións, pero desde 1939 dedicouse só a camións. En 1975 foi integrada na Renault e en 1980 desapareceu a marca.

Antigo sector occidental da cidade de Berlín que constituíu un land da República Federal de Alemaña entre 1949 e 1990. Abranguía unha superficie de 480 km2 e estendíase polos tres sectores da cidade ocupados ao remate da Segunda Guerra Mundial polos exércitos francés, británico e estadounidense. A Constitución do primeiro de outubro de 1950 estableceu unha cámara dos deputados e un senado, que exercía as funcións executivas. O goberno de ocupación interaliado continuou exercecendo a súa xurisdición nas materias de seguridade e nas relacións de Berlín coas autoridades estranxeiras. No ano 1990 o Berlín Occidental fusionouse co Berlín Oriental, co fin de constituír o novo Berlín reunificado e converterse en capital de Alemaña.

Antigo sector oriental da cidade de Berlín que constituíu un bezirk da República Democrática Alemana, da que foi a capital ata 1990. Abranguía unha superficie de 403 km2, estendéndose sobre o territorio ocupado polo exército soviético ao remate da Segunda Guerra Mundial. Era a única cidade da RDA onde a participación do sector terciario na distribución do emprego e na produción era superior ao do sector secundario. Nela tiñan a sede todos os ministerios, todas as embaixadas e a maioría das institucións estatais. A constitución de 1949 considerou a Berlín como capital da RDA, pero ata o 13 de outubro de 1966 o Berlín Oriental non foi incorporado formalmente á RDA. No ano 1990 os dous sectores de Berlín fusionáronse para constituír o novo Berlín reunificado e converterse en capital de Alemaña.

Conferencia política reunida en Berlín do 15 de novembro de 1884 ao 26 de febreiro de 1885 co obxecto de solucionar os conflitos xurdidos entre as grandes potencias no reparto de África. Chamada oficialmente Conferencia da África Occidental, participaron delegados das principais potencias europeas e dos EEUU. A conferencia dirimiu os conflitos territoriais, garantiu a liberdade de navegación polos grandes ríos africanos como o Níxer e o Congo, recoñeceu a existencia do estado libre do Congo baixo a soberanía de Leopoldo II de Bélxica, e fixou as novas normas do imperialismo colonial que establecían a necesidade de ocupación efectiva.

Conferencia política reunida en Berlín do 13 de xuño ao 13 de xullo de 1878, presidida por Bismarck e convocada, baixo a presión de Inglaterra e Austria-Hungría, para revisar a paz de San Estéfano, pola que Rusia eliminaba a Turquía dos Balcáns. Rusia aceptou a división da Gran Bulgaria en dous sectores: a rexión norte como principado autónomo e a rexión sur como provincia otomana (Rumelia Oriental), dirixida por un gobernador cristián; recoñeceu tamén a independencia de Romanía, Serbia e Montenegro. Inglaterra recuperou Chipre, Austria-Hungría acadou a administración de Bosnia-Herzegovina e Rusia conservou Kars, Ardahan e Batumi.

Barreira fortificada que cercou o sector occidental da cidade de Berlín desde 1961 a 1989. Foi construído na noite do 12 ao 13 de agosto de 1961 polas autoridades da República Democrática Alemana, coa intención de impedir o constante trasvase de cidadáns cara ao sector occidental. Cun perímetro de 45 km e unha altura de 4 m converteuse no símbolo da división entre as dúas Alemañas durante a Guerra Fría. A demolición deste muro da Vergoña, como támen era coñecido, comezou o 9 de novembro de 1989 froito dun movemento popular espontáneo protagonizado por cidadáns do Berlín Oriental.

Pacto asinado entre Austria e Prusia o 28 de xullo de 1742 no transcurso da Guerra de Sucesión de Austria, que asegurou a Federico II de Prusia a rexión da Silesia, agás o condado de Glatz e algúns distritos do SL.

Tratado asinado o 2 de maio de 1939 entre Italia e Alemaña, tamén chamado Pacto de Aceiro. Ademais de constituír un medio de presión política contra Francia, fixo pública a identificación entre o fascismo italiano e o nacionalsocialismo alemán fronte ás outras potencias.

Compañía teatral fundada en Berlín Este, na antiga República Democrática Alemana, por Helene Weigel e Bertolt Brecht. O seu obxectivo era desenvolver teorías, tecnoloxías e prácticas teatrais que fundamentasen e sustentasen o chamado “teatro épico” e crear espectáculos a partir dos textos do propio Brecht, ademais de construír un repertorio teatral universal a partir de textos significativos adaptados e recreados polo propio autor, seguindo os seus criterios de socialización e aquel principio de que a copia non é un fin senón un principio e, consecuentemente, unha arte. En 1954 o Berliner abandona o Kammerspiele do Deutsches Theater para instalarse definitivamente no Theater am Schiffbauerdamm, lugar onde vén desenvolvendo de forma ininterrompida o seu traballo. Despois da morte de Brecht, en 1956, dirixiu a compañía a súa muller, mentres entraba nunha etapa na que o obxectivo fundamental era preservar en estado puro o legado escénico do seu fundador, realizaron xiras por Europa e América...