Berlín Occidental ou Berlín do Oeste

Antigo sector occidental da cidade de Berlín que constituíu un land da República Federal de Alemaña entre 1949 e 1990. Abranguía unha superficie de 480 km2 e estendíase polos tres sectores da cidade ocupados ao remate da Segunda Guerra Mundial polos exércitos francés, británico e estadounidense. A Constitución do primeiro de outubro de 1950 estableceu unha cámara dos deputados e un senado, que exercía as funcións executivas. O goberno de ocupación interaliado continuou exercecendo a súa xurisdición nas materias de seguridade e nas relacións de Berlín coas autoridades estranxeiras. No ano 1990 o Berlín Occidental fusionouse co Berlín Oriental, co fin de constituír o novo Berlín reunificado e converterse en capital de Alemaña.