baixar

1. v t

   Levar a alguén ou algunha cousa de arriba a abaixo, dun punto a outro situado nun nivel inferior ou no chan.

   Ex: Baixou os libros do faiado.

   Antónimos: elevar, erguer, levantar, subir.
2. v t

   Ir de arriba a abaixo, dun punto a outro situado nun nivel máis baixo.

   Ex: Baixamos a corredoira ó trote.

   Sinónimos: abaixar, descender.
3. v t

   Inclinar ou orientar algo cara a abaixo.

   Ex: Baixa un pouquiño a xerra, que así non verte. Non quero que baixes a cabeza cada vez que falo contigo.

   Sinónimos: abaixar. Antónimos: elevar, levantar.
4. v t

   Facer que algunha cousa vaia de máis a menos.

   Ex: Baixamos a temperatura da calefacción porque era excesiva. Nas rebaixas sempre baixan os prezos das cousas.

   Sinónimos: abaixar. Antónimos: subir.
5. v t

   Estender un anaco de tecido para facer máis longa algunha peza de roupa.

   Ex: Baixou unha perna do pantalón máis ca a outra.

   Sinónimos: coller, meter, subir.
6. v i

   Ir dende un lugar, unha posición ou unha altura ata outra máis baixa.

   Ex: Quixemos baixar ata a beira do río, pero había demasiados toxos.

   Sinónimos: abaixar, descender. Antónimos: subir.
7. v i

   Moverse cara á parte de abaixo dalgunha cousa á que se está subido ata chegar ao chan.

   Ex: Baixa xa desa rocha que vas caer.

   Sinónimos: descender. Antónimos: subir.
8. v i

   Saír do interior dun vehículo ou do sitio no que se vai sentado ata ter o corpo no exterior ou os pés no chan.

   Ex: Caín ó baixar do autobús.

   Antónimos: subir, montar.
9. v i

   Ir facéndose algunha cousa máis pequena ou máis escasa.

   Ex: A masa do biscoito baixa se lle abres a porta ó forno mentres se está cocendo. Cada vez que me dás unha insatisfacción, baixan os meus ánimos.

   Sinónimos: diminuír, minguar.
10. v i

    Quedar situado nun nivel máis baixo ou a un grao inferior de intensidade.

    Ex: O Madrid baixou dous postos na clasificación.

    Sinónimos: descender. Antónimos: ascender, subir.
11. v i

    Percorrer unha determinada distancia en dirección sur.

    Ex: Nas vacacións baixaron ata as illas Canarias.

12. v pron

    Moverse de arriba a abaixo ou inclinarse algo ou alguén cara ao chan.

    Ex: A ver se podes recollerme ese pano do chan que levei un golpe nas costas e non podo baixarme. Baixáronseche os calcetíns e vénseche os nocellos.

    Antónimos: erguer.
13. v pron

    Realizar ou dicir algo que provoque a perda da dignidade ou do orgullo.

    Ex: Incomodouse sen motivo e aínda non quere baixarse a falar comigo.

14. v t [INFORM]

    Copiar directamente nun ordenador un programa ou documento, conseguíndoo a través dunha rede como a Internet, do mesmo xeito que se se copiase desde un CD-ROM ou un disquete. Na actualidade é o único medio que ofrecen moitas compañías informáticas para que os usuarios obteñan un programa ou actualicen os seus produtos conforme van saíndo versións melloradas ou corrixidas dos mesmos. A miúdo, o usuario pode escoller entre varios servidores situados en distintos lugares do mundo para realizar a descarga de datos desde aquel que estea menos saturado ou que sexa capaz de transferir paquetes de información a maior velocidade. Aínda que se poden baixar documentos e aplicacións desde calquera servidor, existen máquinas destinadas especificamente a ese labor que traballan conforme ao chamado Protocolo de Transferencias de Ficheiros (File Transfer Protocol ou FTP). Así mesmo, é posible baixar documentos ou aplicacións empregando un navegador, pero existen outras aplicacións destinadas a esta tarefa con opcións como a de deter unha descarga cando se desexe e reanudala cando se precise, sen que os datos baixados anteriormente se perdan.

    Sinónimos: descargar.

Frases feitas

• Baixar a cabeza. Obedecer.

• Baixar a(s) orella(s). Humillarse ou obedecer sen protestar.

• Baixar os santos do ceo. Dise dunha persoa cando está irritada.

• Baixar/arrear os pantalóns. Evacuar as feces.

• Baixar/dobrar o lombo/espiñazo. Traballar.

• Baixarlle a crista/as orellas. Vexar a alguén.

• Baixarlle/rebaixarlle os fumes a alguén. Provocar que perda altiveza.

• En todas partes erguen e baixan. En todos os lugares acontecen as mesmas cousas.

• Non baixar da burra. Insistir con obstinación nunha idea.