bocado

1. s m

   Parte de alimento que se mete dunha vez na boca.

   Ex: Con eses bocados tan grandes que metes na boca vaste esganar.

2. s m

   Acción na que se arrinca un cacho dun alimento cos dentes.

   Ex: Dáme un bocado dese pastel que traes.

3. s m

   Anaco dun alimento que se arrinca coa boca.

   Ex: Comeu a chula en dous bocados.

4. s m

   Mordedura ou ferida que se fai cos dentes.

   Ex: Deulle un bocado no brazo e deixoulle os dentes marcados.

   Sinónimos: chantada, dentada, trabada, trabadela, trabadura, mordedela, mordedura.
5. s m

   Comida apetitosa.

   Ex: Ofreceunos distintos bocados cando chegamos á súa casa.

6. s m

   Espacio de tempo moi curto. OBS: Nesta acepción adoita empregarse o diminutivo, bocadiño.

   Ex: Só tardou un bocado en ir e vir. Tráiocho nun bocadiño.

   Sinónimos: instante, intre, retrinco, momento. Confrontacións: anaco.
7. s m

   Parte do freo que entra na boca das cabalgaduras e que se emprega para dirixilas.

   Ex: Ponlle o bocado ó cabalo que imos marchar.

   Sinónimos: bocal.
8. s m

   Freo dunha cabalería.

   Ex: Para saberes montar a cabalo, o primeiro que tes que aprender é a frear o animal co bocado.

   Sinónimos: bocal.
9. s m [PESCA]

   Parte curva do anzol.

10. s m

    Termo da xerga dos telleiros que corresponde á voz ‘bocado’.

Frases feitas

• Comer nun bocado. Comer ás présas.

• De alí a un bocado. Un pouco de tempo máis tarde.

• Non haber/ter para un bocado. Ser moi escasa a comida ou non ter medios económicos.

• Comer o bocado de Adán. Ser servido en último lugar, en castigo de ingratitude e mala correspondencia.

• Contarlle a alguén os bocados. Fixarse no que come ou terlle envexa do que come.

• Meterlle a alguén un bocado na boca. Dar de comer a quen o necesita.

• Non pasar bocado. Non ser capaz de comer por ausencia de apetito.

• Saír co bocado na boca. Marchar ao acabar de comer.

• Ser algunha cousa bocado caro. Aplícase a algún produto cando polo seu prezo non está ao alcance de todo o mundo.

• Ser un bocado de pan. Aplícase á persoa moi boa e que é de fiar.

• Tomar un bocado. Comer algunha cousa para entreter o estómago.

• Un bocadiño para un neno que se desteta. Moi pouca cantidade.