axustar

1. v t

   Poñer unha cousa na proporción axeitada con respecto doutra, para que se adapte a ela, se encaixe ou se acomode.

   Ex: Axustou o chapeu á cabeza para que non lle caese.

   Sinónimos: adaptar. Antónimos: desaxustar.
2. v t

   Facer que algunha cousa estea en harmonía con outra.

   Ex: Procura axustar o tempo que tes antes do exame para preparalo ben.

   Sinónimos: acomodar, adaptar. Confrontacións: adecuar.
3. v t

   Dar forma a algunha cousa como aquilo que lle é xusto, como unha norma determinada para que concorde ou se corresponda con outra.

   Ex: Axustou a música á letra da canción que compuxo.

4. v t

   Colocar algunha cousa co fin de que o seu funcionamento sexa correcto.

   Ex: Axusta a radio, que se oe mal.

   Antónimos: desaxustar.
5. v t

   Facer cesar as diverxencias á vista dun trato calquera, do pagamento dunha conta, dun salario ou dun acordo económico parecido.

   Ex: Axustamos o prezo do coche e creo que xa me chegan os cartos.

6. v t

   Concertar as condicións dun contrato, dunha transacción ou acordo semellante.

   Ex: Quixeron axustar as condicións da obra antes de comezala.

7. v i e pron

   Ter algunha cousa o tamaño ou a medida precisa para concordar con outra.

   Ex: Aínda que a tampa da ola non é a orixinal axústase ben. Merqueille un anel pero non se lle axustaba ben. Aquela porta non axusta ben.

   Sinónimos: encaixar.
8. v pron

   Corresponder unha cousa con outra ou poñerse en harmonía.

   Ex: A cantidade de tempo que traballas non se axusta ó que gañas.

9. v pron

   Adaptarse aos recursos, regras ou medios dos que se dispón para facer algo.

   Ex: Os novos condutores teñen dificultades para axustarse ó carril.

10. v t [INFORM]

    Adaptar as opcións dunha aplicación ou dun equipo informático para que funcione de xeito correcto e conforme aos desexos ou necesidades establecidas.

11. v t [TECNOL]

    Dar a unha ou máis pezas as dimensións definitivas para que realicen correctamente as súas funcións cando sexan montadas.

12. v t [TÉXT]

    1. Facer e poñer unha cousa de modo que case e veña xusta con outra.

       Sinónimos: entallar.

    2. Fixar unha cousa respecto doutra, de tal xeito que non haxa ocos entre elas ou que non ocupe o lugar ou parte da outra que lle corresponde.

    3. Vir xusto ou cinguido.

13. axustar a paz [DER]

    Estipular un acordo entre estados belixerantes para poñer fin ao estado de guerra e ás hostilidades, no caso de que este acordo non fose acadado anteriormente en virtude dun armisticio ou dunha rendición incondicional.

Frases feitas

• Axustarlle as contas a alguén. Saldar contas ou darlle o que merece. SIN: vingarse.